I kečč ay Aqbayli
Fiḥel arbib i tsekla
Ad d-iniɣ ur nelli
Ɣef ɣuṛ-k i nesla
Asmi terfa tlelli
Terba-k-id d tawla
Ansa yefsa wakli
Tefsiḍ-t ur yettulla
Ad d-iniɣ ay Aqbayli
I k-ḥemleɣ am tala !
I kečč ay ilelli
Yettεennin tarewla
Yak izeddi yizli
Tzeddi tegrawla
Yak yettwaskad yigli
D ucbiḥ, d ul n Mandella
Lḥif ma yettili
Talwit ad yil tella
Ad d-iniɣ ay Aqbayli
I k-ḥemleɣ am tala !
Am tala ur nɣelli
Tella i wenẓar d ayla
Anẓar-ik d tili
Tcerweḍ-tt-id d isula
D aẓṛef ur nettḥili
I tefkiḍ i lalla
Tufiḍ-d anẓar d isli
Tessutleḍ-t d yemẓulla
Ad d-iniɣ ay Aqbayli
Ziɣ ḥemleɣ-k am tala
17 février 2017
Amzur ineqqen..
Enɣ-itt
Kkes-as tudert
Akken ad yidir yes-s wakal
Enɣ-itt
Kkes-as turart
Deg yigenni wis wissen acḥal
Enɣ-itt
Kfu tadmert
Deg turareḍ ajgagal
Enɣ-itt
Bru i tamart
Akken i s-tebra i umzur
. . . . . .
Enɣ-itt ur tettmettat
Emmet, ad k-id-teḥyu
Ḥyu-tt-id am tafat
Txessi ur tkeffu
Kfu-tt, ad k-tɣaḍ
Imi deg-k i tettru
Zwir-itt, ad k-tfat,
Sezwer-itt, ad tettmettat,
Enɣ-itt...
Enɣ-itt imi d nettat
Imi mačči d kečč
Enɣ-itt akken,
Ur teddal tamart amzur
. . .
Enɣ-itt
Sfeḍ-as lεaṛ
N kra deg-k yeffuden
Enɣ-itt
Ad yekkes lεaṛ
I tettaruḍ d amuden
Enɣ-itt
Iḍes-ik yettɣaṛ
Akken ifassen-ik ad tt-awḍen
Enɣ-itt
Tamart teqqaṛ
Di tedmert-is yessden
yeccḍen
Yessḍen s umzur
. . . . . .
Enɣ-itt
Yecceḍ-as unẓad
Akken i k-ccḍen wanẓaden
Ecceḍ, icaḍ lmendad
N tin ur yettaggaden
Aggad mi yefsi uɣeggad
Fsi ma fsan wakuden
Ggall mi tt-terriḍ d aɣalad
Mi tebda leεyaḍ
Enɣ-itt...
Enɣ-itt kan nettat
Nettat mačči d kečč
Enɣ-itt akken,
I k-tenɣa tamart amzur
/https%3A%2F%2Fstorage.canalblog.com%2F80%2F56%2F512160%2F30936832_o.jpg)
/https%3A%2F%2Fstorage.canalblog.com%2F26%2F19%2F512160%2F30936496_o.gif)
/https%3A%2F%2Fstorage.canalblog.com%2F48%2F72%2F512160%2F30330549_o.jpg)
/https%3A%2F%2Fprofilepics.canalblog.com%2Fprofilepics%2F4%2F3%2F438943.jpg)